Rama me forca të shumta policore. – Nis vaksinimi anti-Covid në Shkodër

– 16/02/21

Këtë të martë ka nisur vaksinimi anti-Covid në Shkodër. Ardhja e 720 dozave të vaksinës Pfizer i ka hapur rrugë skenarit të qeverisë për të nisur vaksinimin në qarqe të tjera të vendit, krahas Tiranës.

Injektimi i vaksinave anti-Covid po kryhet në Pallatin e Sportit, dhe prezent është kryeministri Edi Rama e ministrja e Shëndetësisë, Ogerta Manastirliu.

Rama ka mbërritur në qytetin veriperëndimor me një prezencë të shtuar të policisë. Kjo për shkak të një proteste të paralajmëruar nga ana e qytetarëve banesat e të cilëve janë prekur nga përmbytjet dhe moti i acartë.

Procesi i vaksinimit pritet që të nisë edhe për qarkun e Vlorës, më pas për Korçën e Fierin. Dhe, paralelisht me vaksinimin e bluzave të bardha, do të nisë edhe vaksinimi i më të moshuarve.

Deri më tani Shqipëria, ka përdorur vaksinat anti-Covid të Pfizer. Megjithatë, sipas kryeministrit Edi Rama, pritet të nënshkruhet një marrëveshje edhe me kompaninë AstraZeneca.

Gazeta Mapo